جگشا گھوش  قتل کیس: عدالت کا سخت فیصلہ

دو کو پھانسی، ایک کو عمر قید کی سزا
نئی دہلی۔ 2009 کے جگشا گھوش قتل کیس میں دو قصورواروں کو دہلی کے ساکیت کورٹ نے آج پھانسی کی سزا سنائی جبکہ ایک کو عمر قید کی سزا دی گئی ہے۔ کورٹ نے جگشا گھوش قتل کیس کو رئیر آف دی رئیرسٹ کرائم مانا ہے۔ عدالت نے امت شکلا اور روی کپور کو موت کی سزا جبکہ بلجیت ملک کو عمر قید کی سزا سنائی۔
غور طلب ہے کہ انفارمیشن ٹیکنالوجی کے شعبے میں کام کرنے والی جگشا گھوش کو سال 2009 کے مارچ میں اغوا کے بعد قتل کر دیا گیا تھا۔ ایڈیشنل سیشن جج سندیپ یادو نے مجرم قرار دیے گئے روی کپور، امت شکلا اور بلجیت سنگھ ملک کی سزا کا فیصلہ کرنے کے لئے 22 اگست کی تاریخ مقرر کی تھی۔ استغاثہ کے وکیل نے عدالت کو آگاہ کیا تھا کہ یہ مجرم انڈیا ٹوڈے گروپ کی صحافی سومیا وشوناتھن اور ایک ٹیکسی ڈرائیور کے قتل کے مقدمے کا بھی سامنا کر رہے ہیں۔ وہیں مدعا علیہان کے وکیل نے ان کے ساتھ یہ کہہ کر نرمی برتنے کی اپیل کی کہ مجرم ابھی کم عمر کے ہیں۔
جگشا (28) ہیوٹ ایسوسی ایٹ پرائیویٹ لمیٹڈ میں آپریشنز منیجر کے عہدے پر تھی۔ اس کا 18 مارچ، 2009 کو دفتر کی گاڑی سے جنوبی دہلی کے وسنت وہار علاقے میں واقع گھر کے قریب اترنے کے بعد صبح تقریبا چار بجے اغوا کر لیا گیا تھا۔ اس کی لاش 20 مارچ کو ہریانہ میں سورج كنڈ کے پاس ملی تھی۔ بعد میں پولیس نے کپور، شکلا اور ملک کو اس معاملے میں گرفتار کیا تھا۔