ایٹہ۔ ایٹہ ضلع کے علی گنج علاقے میں آج صبح ہوئے بھیانک سڑک حادثے میں25بچوں کی موت ہو گئی اور تیس سے زیادہ زخمی ہو گئے۔ پولیس ذرائع نے یہاں بتایا کہ جے ایس ودیا پبلک اسکول کی بس بچوں کو لے کر جا رہی تھی۔ علی گنج-دريا پر راستے میں اسدپور گاؤں کے نزدیک ریت لدے ایک تیز رفتار ٹرک نے بس کو ٹکر مار دی۔ حادثے میں بائیس بچوں کی موقع پر ہی موت ہو گئی اورچالیس زخمی ہو گئے۔
اطلاع ملنے پر موقع پر پہنچی پولیس نے زخمی بچوں کو اسپتال پہنچایا، جہاں بہت سے بچوں کی حالت نازک بتائی جا رہی ہے۔ کہا جا رہا ہے کہ ہلاکتوں کی تعداد بڑھ سکتی ہے۔ شدید زخمی بچوں کو علی گڑھ ریفر کیا گیا ہے۔ اس درمیان مہلوک بچوں کے خاندان میں کہرام مچا ہوا ہے۔ ڈی ایم شمبھوناتھ، ایس ایس پی اور دیگر اعلی افسران موقع پر موجود ہیں۔بتایا جا رہا ہے کہ سردی کی وجہ سے اسکول میں چھٹی کا حکم تھا۔ اس کے باوجود اسکول کھلا ہوا تھا۔
یوپی کے وزیر اعلی اکھلیش یادو نے بھی بچوں کی موت پر غم کا اظہار کرتے ہوئے زخمیوں کے مفت علاج کا اعلان کیا ہے۔ وزیر اعلی نے حکم دیا کہ تمام زخمیوں کو بہتر سے بہتر سہولت مہیا کرائی جائے۔ اس درمیان ایٹہ کے ڈی ایم شمبھوناتھ سنگھ نے جے ایس پبلک اسکول کی منظوری منسوخ کرنے کا حکم دیتے ہوئے معاملہ میں ایف آئی آر درج کرانے کو کہا ہے۔
وزیر اعظم نریندر مودی نے ایٹہ میں ہوئے سڑک حادثے پر رنج وغم ظاہر کیا ہے۔ وزیر اعظم نے ٹویٹ کر کہا کہ میں خدا سے دعا کرتا ہوں کہ اس حادثے میں زخمی ہوئے بچے جلد ٹھیک ہو جائیں۔ حادثے میں مارے گئے بچوں کے خاندان سے میں اظہار تعزیت کرتا ہوں۔
مرکزی وزیر داخلہ راج ناتھ سنگھ نے ٹویٹ کیا، ‘ایٹہ میں ہوئے سڑک حادثہ میں اتنی قیمتی زندگیاں کھونے سے مجھے بڑا دکھ پہنچا ہے۔ یوپی کے ڈی جی پی جاويد نے خود ٹویٹ کر کہا، علی گڑھ کے ایٹہ میں سڑک حادثہ ہوا ہے۔ 15 سے زیادہ بچوں کی موت ہوئی ہے۔ زخمیوں کو اسپتال میں داخل کرایا گیا ہے۔
