پنجاب اسمبلی میں ٹکراو کی صورتحال

مجیٹھیا پر کانگریس کے ممبران اسمبلی نے پھینکا جوتا
چندی گڑھ : پیر کی شام سے پنجاب اسمبلی کے اسمبلی ہال میں دھرنا پر بیٹھے کانگریس کے ممبران اسمبلی کے مظاہرہ کے درمیان بدھ کو حالات بگڑ گئے۔ پنجاب اسمبلی میں اکالی دل کے وزیر بکرم سنگھ مجیٹھیا پر کانگریس کے ممبران اسمبلی نے جوتا پھینک دیا ، جس کے بعد دونوں طرف سے ٹکراؤ کی صورت حال بن گئی اور اس کی وجہ سے درمیان میں مارشلس کو تعینات کرنا پڑ گیا ۔ اسمبلی میں کانگریس کے ممبران اسمبلی نے اسپیکر پر کاغذ اور فائلیں بھی پھینکیں۔
تاہم پنجاب اسمبلی میں کانگریس کے ممبران اسمبلی کی سخت مخالفتوں اور 200 مارشلس کی تعیناتی کے درمیان پنجاب حکومت اور اسپیکر نے زیر التوا بل اور تجاویز پاس کئے۔ تاہم حالات اس وقت خراب ہونے شروع ہوئے ، جب اسمبلی میں اکالی دل کے وزیر سکندر سنگھ ملوكا اور اکالی دل کے ممبر اسمبلی ورسا سنگھ ولٹوها نے اسمبلی میں دو رات گزارنے والے کانگریس کے ممبران اسمبلی پر ایوان میں شراب پینے اور ایوان کو ہوٹل اور بار کی طرح استعمال کرنے کا الزام لگایا۔
خیال رہے کہ کانگریس کے 26 ممبران اسمبلی نے لگاتار دوسری رات اسمبلی کے ہال میں ہی گزاری ۔ منگل کی دوپہر میں ان ممبران اسمبلی سے ملنے کے لئے اور دھرنا ختم کروانے کیلئے پنجاب کے وزیر اعلی پرکاش سنگھ بادل بھی پہنچے تھے۔ وزیر اعلی نے کانگریس کے ممبران اسمبلی کو دھرنا ختم کرنے کے لئے کہا ، لیکن مظاہرہ کر رہے ممبران اسمبلی نے ایوان سے باہر جانے سے انکار کر دیا۔ کانگریس کے ممبران اسمبلی نے وزیر اعلی بادل سے کہا تھا کہ پہلے پنجاب کے مسائل حل کرو، کانگریس ممبران اسمبلی کو ایوان میں بولنے کا موقع دو، پھر دھرنا ختم کریں گے۔