چکن گنیا اور ڈینگی سے بہت زیادہ گھبرانے کی ضرورت نہیں: نڈڈا

نئی دہلی:دارالحکومت میں ڈینگی اور چکن گنیا کے بڑھتے پھیلتے اثرات اور لوگوں کے بڑے پیمانے پر بیمار پڑنے کے واقعات درمیان مرکزی وزیر صحت دنیا روشنی نڈڈا نے آج یہاں لوگوں سے کہا ہے کہ چکن گنیا اور ڈینگی سے بہت زیادہ گھبرانے کی ضرورت نہیں۔مچھرسے پیدا ہونے والی بیماریوں کی لہر کے دوران اب تک دہلی میں چھ افراد کی موت ہو چکی ہے اور ایک ہزار سے زیادہ کے متاثر ہونے کی خبروں کے پیش نظر مسٹر نڈڈا نے آج یہاں مرکزی حکومت کے چار بڑے ہسپتالوں رام منوہر لوہیا، آل انڈیا انسٹیٹیوٹ، لیڈی ہارڈنگ اور صفدر جنگ کے طبی حکام کے ساتھ اعلی سطحی میٹنگ کر کے حالات کا جائزہ لیا۔میٹنگ کے بعد وزیر صحت نے نامہ نگاروں کو بتایا کہ دارالحکومت دہلی سمیت پورے ملک میں چکن گنیا اور ڈینگی سے نمٹنے کے انتظامات میں کہیں کوئی کمی نہیں ہے ۔ خون جانچ کی سہولت اور ادویات بھی کافی مقدار میں دستیاب ہیں، ایسے میں کسی طرح کی گھبراہٹ کا شکاار ہونے کی ضرورت نہیں ہے ۔ انہوں نے لوگوں سے کہا کہ جیسے ہی بخار ہو یا بیماری کی کوئی علامت نظر آئے ، فورا اس کی جانچ کروائیں اور دوا لیں۔اس درمیان دہلی حکومت نے چکن گنیا بخار اور ہڈی توڑ درد کے دوران ہوئی اموات کے معاملے کی تحقیقات کا حکم دے دیا ہے ۔ دارالحکومت میں اب تک اس بیماری کے پھیلنے کے دوران چھ لوگوں کی موت ہو چکی ہے . یہ اموات گنگا رام، ھندوراو اور اپالو ہسپتال میں ہوئی ہیں۔دہلی کے وزیر صحت ستیندر جین نے کہا ہے کہ چکن گنیا کی وجہ سے موت کے یہ جتنے بھی معاملے سامنے آئے ہیں، وہ سب کے سب نجی ہسپتالوں کے ہیں۔ کسی بھی سرکاری ہسپتال میں کسی مریض کی موت کا کوئی معاملہ ابتک سامنے نہیں آیا۔ مسٹر جین نے کل دیر رات تقریبا 10 ہسپتالوں کا معائنہ کیا. اس کی اطلاع انہوں نے خود ٹویٹ کرکے دی ہے ۔ مسٹر جین نے کہا،کہ “دہلی حکومت کے تحت آنے والے ہسپتالوں میں ہر جگہ ڈینگی اور چکن گنیا کے علاج کے لئے کافی سہولیات ہیں اس لئے گھبرانے کی کوئی ضرورت نہیں ہے “۔