گیا میں رشوت لیتے ہوئے سب انسپیکٹر گرفتار

گیا:بہار ریاستی ویجیلینس بیورو نے گیا ضلع کے مگدھ میڈیکل تھانہ کے سب انسپیکٹر کودس ہزار روپے رشوت لیتے ہوئے گرفتارکرلیا ہے ۔بیورو کے سرکاری ذرائع نے آج یہاں بتایا کہ اسی تھانہ علاقے کے رہنے والے بھاگوت وشوکرما نے محکمہ میں تحریری شکایت درج کی تھی کہ سب انسپیکٹر راجیندر پرساد سنگھ نے ان کے ضبط کئے گئے ٹرک کو چھوڑنے کے عوض میں 12ہزار روپے کی رشوت کا مطالبہ کیا تھا،لیکن معاملہ دس ہزار روپے پر طے ہوا ہے ۔معاملہ درج ہونے کے بعد اس کی تصدیق ہونے پر بیورو کی ایک ٹیم تشکیل دی گئی۔ذرائع نے بتایا کہ اسی ٹیم نے سب انسپیکٹر کو کل رات کوتوالی تھانہ علاقے کے رنگ بہادر روڈ پر فریادی سے دس ہزار روپے رشوت لیتے ہوئے رنگے ہاتھ گرفتار کرلیا۔ذرائع نے بتایا کہ گرفتار سب انسپکٹر کو بیورو ہیڈکواٹر پٹنہ لے جایا گیا ہے جہان ان سے پوچھ گچھ کی جارہی ہے ۔پوچھ گچھ کے بعد سب انسپیکٹر مسٹر سنگھ کو نگرانی کی خصوصی عدالت میں پیش کیا جائے گا۔