’سال کی گولڈن ٹویٹ‘: انوشکا ویرات کی شادی کا اعلان

بولی وڈ اداکارہ انوشکا شرما اور ہندوستانی کرکٹ ٹیم کے کپتان ویرات کوہلی کی شادی رواں ماہ ہوئی جس کا تذکرہ پورے دسمبر خبروں کے ساتھ ساتھ سوشل میڈیا پر بھی خوب کیا گیا۔

سماجی رابطے کی ویب سائٹ ٹوئٹر کے ایک بیان کے مطابق اداکار انوشکا شرما کا اپنی شادی کے اعلان کے لیے کی گئی ٹویٹ رواں سال کی سب سے زیادہ ری ٹویٹ ہونے والی پوسٹ قرار پائی ہے۔

اس ٹویٹ میں انوشکا شرما نے ویرات کوہلی کے ساتھ اپنی شادی کی ایک تصویر بھی شیئر کی تھی۔

ویسے تو اس ٹویٹ کو کیے ہوئے صرف چند ہفتے گزریں ہیں، اس کے باوجود اسے ’گولڈن ٹویٹ آف دی ایئر‘ کہا جارہا ہے۔

اپنی ٹویٹ میں انوشکا نے لکھا تھا کہ ’آج ہم نے ایک دوسرے سے وعدہ کیا ہے کہ ہم ایک دوسرے کے ساتھ محبت کے ساتھ رہیں گے اور ہمیں یہ خبر سب کے ساتھ شیئر کرنے میں خوشی محسوس ہو رہی ہے کہ آج کے خوشںصیب دن ہم ہمیشہ کے لیے ایک ہوگئے‘۔

خیال رہے کہ انوشکا شرما اور ویرات کوہلی نے اٹلی کے خوبصورت شہر ملان میں رواں ماہ شادی کی، جس کے بعد انہوں نے دہلی میں اپنی شادی کی ایک تقریب منعقد کی تھی۔