ديسا : وزیر اعظم نریندر مودی نے آج نوٹ بندي کے فیصلے کو لے کر ایک بار پھر اپوزیشن کو آڑے ہاتھوں لیا۔ انہوں نے پھر دوہرایا کہ نوٹ بندی سے ابتدائی دنوں میں تکلیفیں ضرور ہوں گی، لیکن اس کے دور رس فوائد ہوں گے۔ مودی نے گھوٹالہ کرنے والے بینک ملازمین اور بلیک منی رکھنے والوں کو خبردار کرتے ہوئے کہا کہ وہ کسی حال میں بچ نہیں پائیں گے۔
قبل ازیں وزیر اعظم مودی نے گجرات کے بناسكانٹھا میں 350 کروڑ روپے کی سرمایہ کاری سے تعمیر فیکٹری کا افتتاح کیا۔ اس کے بعد انہوں نے ایک جلسہ عام سے خطاب کیا ، جس میں اپوزیشن پر جم کر نشانہ سادھا۔ انہوں نے کہا کہ پارلیمنٹ کو نہیں چلنے دیا جا رہا ہے، صدر جمہوریہ جو خود تجربہ کار ایڈمنسٹریٹر ہیں، انہوں نے اپوزیشن کو نام لے کر ٹوکا ہے ۔ لوک سبھا میں مجھے بولنے نہیں دیا جاتا ہے ، اسی لئے میں جلسہ عام میں بول رہا ہوں ۔ میں اپوزیشن جماعتوں سے کہنا چاہتا ہوں کہ آپ یہ تو کہنے کی ہمت نہیں کر رہے ہو کہ 500 اور 1000 کے نوٹ والا فیصلہ ختم کرو ، لیکن آپ یہ تو کر سکتے ہو کہ جیسے انتخابات میں ہم سب الیکٹرانک ووٹنگ مشین کے بارے میں بتاتے ہیں، ویسے ہی بینکنگ لوگوں کو سکھائیں۔ کچھ لوگ کہتے ہیں کہ یہ فیصلہ ایک ہفتہ کے لئے روک لو، کیوں بھلا ایسا کیا جادو کرنے والے ہو؟
وزیر اعظم نے مزید کہا کہ آج كل نوٹوں پر کافی بات ہو رہی ہے۔ 8 تاریخ سے پہلے صرف بڑوں کی پوچھ تھی، صرف 1000 اور 500 کی، چھوٹوں کی پوچھ تھی کیا 100، 50 کے نوٹ کی؟ لیکن اب چھوٹوں کی پوچھ ہے، بڑوں کو کوئی دیکھتا ہی نہیں۔ ملک کی معیشت نوٹوں کے ڈھیر کے نیچے دب رہی تھی ، دہشت گردوں کو طاقت جعلی نوٹوں سے ملتی ہے ، دہشت گردوں کو جہاں سے راستہ ملتا تھا ، اسے روکنے میں ہم کامیاب رہے ہیں۔ جتنی پریشانیاں یہاں ہو رہی ہیں ، اس سے زیادہ باہر سرحد پار ہیں ۔ نکسل بھی ختم ہو رہا ہیں۔ ہتھیار ڈال کر مرکزی دھارے میں واپس آ رہے ہیں۔
انہوں نے مزید کہا کہ میں نے پہلے ہی کہا تھا کہ 50 دن تک مشکلات جھیلنی پڑیں گی ، لیکن اس کے بعد آپ خود دیکھیں گے کہ حالات کس طرح بہتر ہوئے ہیں، جن لوگوں کو لگ رہا ہے کہ انہوں نے کوئی کھیل کر لیا ہے، وہ بچنے والے نہیں ہیں، ایک دو ماہ یا 6 ماہ، لیکن سب پکڑے جائیں گے۔
وزیر اعظم نے کہا کہ آپ نے اپنے خود دیکھا ہو گا کہ کس طرح بینک والے پکڑے جا رہے ہیں، لوگ گڈی کے ساتھ پکڑے جا رہے ہیں، انہیں لگا تھا کہ ہم پچھلے دروازے سے پیسے لے جائیں گے، لیکن انہیں معلوم نہیں تھا کہ مودی نے پیچھے بھی کیمرے لگا رکھے ہیں، ایماندار آدمی جو قطار میں کھڑا ہے، وہ اپنے لئے نہیں بلکہ ملک کے لئے کھڑا ہے۔
