کراچی کے مختلف علاقوں میں جماعت اسلامی کے کارکنان شہر میں جاری بجلی اور پانی کے بحران کے خلاف سڑکوں پر نکل آئے اور احتجاج کیا۔
احتجاج کے باعث شہر کے مختلف علاقوں میں ٹریفک کی روانی شدید متاثر ہے جس کی وجہ سے صبح اپنے گھروں سے دفتروں یا روز مرہ کے کاموں کے لیے نکلنے والے افراد کو شدید مشکلات کا سامنا ہے۔
کراچی کے علاقے ملیر ماڈل کالونی میں ہڑتال کے دوران دکانیں بند ہیں — فوٹو، عبداللہ وحید راجپوت
مذہبی جماعت کے کارکنان نے نارتھ کراچی، حسن اسکوائر، اورنگی ٹاؤن، مومن آباد، دہلی کالونی، ملیر کالا بورڈ سمیت شہر کے مختلف علاقوں میں احتجاج کیا۔
اس حوالے سے جماعت اسلامی کا کہنا تھا کہ بجلی کی لوڈ شیڈنگ اور پانی کی قلت کے خلاف احتجاج کیا جا رہا ہے۔
