پاکستان کی روبینہ ہندوستان کی جیل میں چارسال سے بند ، دھوکہ دے کر بھاگ گیا شوہر

نئی دہلی : پاکستان کی حیدرآباد میں موسی کالونی میں رہنے والی ایک لڑکی روبینہ اپنے شوہر کی بے وفائی کی وجہ سے آج در بدر کی ٹھوکریں کھا نے پر مجبور ہے اور جموں کشمیر کی جیل میں بند ہے۔ اتنا ہی نہیں روبینہ کی ایک بیٹی بھی ہے ، جس کا نام جانسر ہے ۔ وہ بھی اپنی ماں کے ساتھ جیل میں بند ہے۔
قابل ذکر ہے کہ روبینہ پاکستان کی رہنے والی ہے ، لیکن فی الحال جموں کی كوٹ بھلوال جیل میں بند ہے۔ نومبر 2012 میں روبینہ علاج کے لئے اپنے شوہر اور دو ماہ کی بچی کے ساتھ دہلی آئی تھی، لیکن روبینہ کا شوہر اس کے تمام کاغذات اور پیسے لے کر فرار ہو گیا ، جس کے بعد روبینہ کئی دنوں تک در بدر بھٹکتی رہی۔
آخركار روبینہ کو دہلی میں کچھ لوگ ملے ، جنہوں نے اسے کچھ پیسے دیئے اور کپڑے دئے۔ اس کے بعد کئی دنوں تک روبینہ دہلی اور امرتسر ریلوے اسٹیشن کے چکر کاٹتی رہی، لكن اسے اس کے شوہر کے بارے میں کچھ پتہ نہیں چلا۔ تھک ہار کر روبینہ دہلی واپس لوٹ گئی، پھر اسے کسی نے جموں کے راستے پاکستان جانے کا مشورہ دیا اور آخر میں روبینہ اپنی بچی کے ساتھ جموں پہنچ گئی۔ جموں پہنچ کر روبينہ کسی سے بارڈر کا راستہ پوچھ کر سرحد پر چلی گئی۔
روبینہ نے 17 نوبر 2012 کو جموں کے كاناچك سرحد سے پاکستان جانے کی کوشش کی ، لیکن سیکورٹی فورسز نے اسے گرفتار کر لیا۔ سیکورٹی فورسز نے روبینہ کو پولیس کے سپرد کردیا ، جس کے بعد اس سے کافی پوچھ گچھ کی گئی اور اس کو عدالت میں پیش کیا گیا۔ عدالت نے روبینہ کو اگست میں دو ماہ کی سزا سنائی۔ سزا پوری ہونے کے بعد روبینہ کو چھوڑ تو دیا گیا ، لیکن پھر اسے عوامی تحفظ ایکٹ کے تحت گرفتار کر لیا گیا۔
آج روبینہ کی سزا پوری ہوئے کئی سال بیت گئے ہیں اور اب روبینہ کی بیٹی بھی بڑی ہو گئی ہے، لیکن روبینہ اپنے ملک نہیں جا سکی۔ جموں وکشمیر جیل کے ڈائریکٹر جنرل ایس کے مشرا کے مطابق روبینہ کو کونسلر ایکسس کے لئے دو مرتبہ امرتسر کے واگہہ بارڈر پر لایا گیا، لیکن پاکستان نے اسے اپنانے سے انکار کر دیا۔ پاکستان ہائی کمیشن نے اس کی شناخت نہیں کی۔ اب جیل میں روبینہ اور اس بچی کو ہر سہولت فراہم کی جا رہی ہے۔
ایس کے مشرا کے مطابق اب ہم کوشش کر رہے ہیں کہ روبینہ کو فروری میں پھر امرتسر لے جائیں ، تاکہ پاکستانی ہائی کمیشن کے لوگ اسے پہچان سکیں اور روبینہ اپنے وطن واپس جا سکے۔ روبینہ 2012 سے اپنی بچی کے ساتھ جیل میں ہے، لیکن وہ اسی انتظار میں ہے کہ کب اپنے وطن پاکستان پہنچے۔ روبینہ اپنے شوہر کی بے وفائی کا صلہ آج تک جیل میں بھگت رہی ہے۔